اسلام آباد۔6جون (اے پی پی) پاکستان حضور اکرم صلی اللہ علیہ وسلم بارے بھارت دی حکمران بھارتیہ جنتا پارٹی دے ݙو سینئر عہدیداراں دے توہین آمیز ریمارکس دی شدید الفاظ اچ مذمت کریندے ہوئیں بھارتی ناظم الامور کوں وزارت خارجہ سݙ تے سخت احتجاج کیتے ۔ وزارت خارجہ دے ترجمان دی طرفوں جاری بیان موجب بھارتی ناظم الامور کوں ݙسایا ڳیا جو اے ریمارکس مکمل طور تے ناقابل قبول ہن تے اینکوں نہ صرف پاکستانی عوام بلکہ پوری دنیا دے مسلماناں دے جذبات کوں شدید ٹھیس پڄی اے ۔ بھارتی سفارت کار کوں ݙسایا ڳیا جو پاکستان بی جے پی حکومت دی طرفوں مذکورہ عہدیداراں دے خلاف تاخیری اتے بے کار تادیبی اقدامات تے افسوس دا اظہار کریندے جیں توں مسلماناں دے درد کوں گھٹ نی کیتا ونڄ سڳدا ۔ بیان اچ آکھیا ڳئے جو پاکستان کوں بھارت اچ مسلماناں دے خلاف فرقہ وارانہ تشدد اتے نفرت اچ خطرناک حد تئیں اضافے تے گہری تشویش اے، بھارت اچ مسلماناں کوں منظم طریقے نال بدنام کیتا ویندا پئے ، انہاں پسماندہ رکھیا ویندا پئے تے انہاں کوں بنیاد پرست ہندو ہجوم دے منظم حملے دا نشانہ بݨایاویندا پئے جیں اچ انتہا پسنداں کوں بھارت دی مختلف ریاستاں دے سکیورٹی اداریں دی مکمل حمایت حاصل اے۔ ترجمان آکھیے جو بھارت اچ مسلم مخالف جذبات دا ودھݨ تے مرکزی دھارے اچ شامل ہووݨ دے نال نال فضول تاریخی دعویں دا حوالہ ݙے تے مسلماناں کوں انہاں دی صدیاں پراݨی عبادت گاہواں توں محروم کرݨ دی ودھدیاں ہوئیاں کوششاں بھارتی معاشرے اچ اسلامو فوبیا دے واضح نتیجے دے سوا کجھ کائنی ۔ بیان اچ آکھیا ڳئے جو پاکستان بی جے پی دی قیادت تے بھارتی حکومت توں پرزور مطالبہ کریندے جو او بی جے پی دے عہدیداراں دے توہین آمیز ریمارکس دی واضح طور تے مذمت کرن تے ایں ڳالھ کوں یقینی بݨاون جو انہاں دے خلاف فیصلہ کن اتے قابل عمل کارروائی دے ذریعے انہاں تو جواب ڳھدا ونڄے ۔ بھارتی حکومت کوں بین الاقوامی قانون دے تحت اپݨی ذمہ واریاں بارے وی یاد ݙویندے ہوئیں آکھیا ڳئے جو او اقلیتاں کوں انسانی حقوق دیاں خلاف ورزیاں توں بچݨ کیتے فوری اقدامات کرے، انہاں دی حفاظت، سلامتی اتے بہبود کوں یقینی بماوے تے انہاں کوں امن دے نال آپݨے عقائد تے چلݨ تے ایں تے عمل کرݨ دی اجازت ݙتی ونڄے ۔ پاکستان عالمی برادری خاص طور تے اقوام متحدہ، او آئی سی اتے انسانی حقوق دیاں تنظیماں توں مطالبہ کیتے جو او بھارت اچ خطرناک حد تئیں ودھدے ہوئے ”ہندوتوا” توں متاثر اسلامو فوبیا دا نوٹس گھن تے اینکوں روکے تے بھارت اچ اقلیتاں دے خلاف انسانی حقوق دی منظم خلاف ورزیاں کوں روکݨ کیتے بھارتی حکام تے دباؤ پاوے ۔
.jpg)
