اسلام آباد۔9جون (اے پی پی):اڳلے مالی سال کیتے معاشی شرح نمو 3.5 فیصد رہݨ دا تخمینہ اے جݙاں جو افراط زر دی شرح اندازاً 21 فیصد تئیں ہوسی ، بجٹ خسارہ 6.54 فیصد اتے پرائمری سرپلس جی ڈی پی دا 0.4 فیصد ہوسی۔ جمعہ کوں وزیر خزانہ محمد اسحاق ڈار بجٹ تقریر کریندے ہوئیں آکھیے جو اڳلے مالی سال کیتے برآمدات دا ہدف 30 ارب ڈالر جݙاں جو ترسیلات زر دا ہدف 33 ارب ڈالر اے۔ اڳلے سال ایف بی آر محاصل دا تخمینہ 9,200 ارب روپے اے جیں اچ صوبیں دا حصہ 5,276 ارب روپے ہوسی۔ وفاقی نان ٹیکس محصولات 2,963 ارب روپے ہوسن ۔ وفاقی حکومت دی کل آمدن 6,887 ارب روپے ہوسی۔وفاقی حکومت دے کل اخراجات دا تخمینہ 14,460 ارب روپے اے جیں اچوں انٹرسٹ پیمنٹ تے 7,303 ارب روپے خرچ تھیسن ۔ اڳلے سال پی ایس ڈی پی کیتے 950 ارب روپے دا بجٹ مختص کیتا ڳئے ۔ ایں توں علاوہ پبلک پرائیویٹ پارٹنرشپ دے ذریعے 200 ارب روپے دی اضافی رقم دے بعد مجموعی ترقیاتی بجٹ 1,150 ارب روپے دی تاریخی بلند ترین سطح تے ہوسی ۔ انہاں آکھیے ملکی دفاع کیتے 1.804 ارب روپے سول انتظامیہ دے خرچیں کیتے 714 ارب روپے مہیا کیتے ویسن ۔ پنشن دی مد اچ 761 ارب روپے رکھئن ۔ بجلی گیس اتے ٻئے شعبہ جات کیتے 1.074 ارب روپے دی رقم بطور سبسڈی رکھی ڳئی اے۔
