ٹرانسپورٹرز کوں حراساں کرنڑ آلے اہلکاراں دے خلاف سخت ایکشن گھننڑ دی ہدایت
اسلام آباد ۔ 26 اگست (اے پی پی) وزیرِ اعظم عمران خان دی زیر صدارت نیشنل ہائی ویز سیفٹی آرڈیننس2000 ءدے نفاذ، قانون تے عمل درآمد دے سلسلے اچ متعلقہ فریقین دے تحفظات اتے ازالے کیتے مستقبل دے لائحہ عمل متعلق اعلیٰ سطحی اجلاس سنوار کوں تھیا۔اجلاس اچ وزیرِ مواصلات مراد سعید، مشیر تجارت عبد الرزاق داود اتے وزارتِ مواصلات اتے وزارتِ صنعت و تجارت دے سینئر افسراں شرکت کیتی ۔اجلا س اچ نیشنل ہائی ویز سیفٹی آرڈیننس 2000 دے نفاذ خصوصاً ایکسل لوڈ دے حوالے نال متعلقہ فریقین دے تحفظات اتے عدالتی احکامات دا تفصیلی جائزہ گھدا گیا۔ سیکرٹری مواصلات جواد رفیق نیشنل ہائی ویز سیفٹی آرڈیننس 2000 ءدے نفاذ دے ضمن اچ ہنڑ تئیں دی پیشرفت ، ملکی سڑکاں دی موجودہ صورتحال، ذرائع مواصلات بشمول پاکستان ریلویز دی رسد و ترسیل دے حوالے نال استعداد دی صورتحال، ایکسل لوڈدے حوالے نال قانون دے نفاذ دے معیشت تے اثرات اتے متعلقہ فریقین دے تحفظات تے تفصیلی بریفنگ ڈتی۔وزیرِ اعظم کوں ڈسایا گیا جو سڑکاں دی مرمت تے ڈیکھ بھال دے ضمن اچ نیشنل ہائی وے اتھارٹی کوں سالانہ 65 ارب روپے دے خرچے برداشت کرنڑیں پوندن ۔ٹرکاں تے منظور شدہ لوڈ دے علاوہ اضافی بوجھ لڈنڑ پاروں سڑکاں ترٹ ویندن بلکہ حادثیں دا باعث وی بنڑدین جیں نال قیمتی جاناں دا ضیان تھیندے ۔ وزیرِ اعظم اجلاس نال خطاب کریندے ہوئیں آکھیا جو نیشنل ہائی ویز سیفٹی آرڈیننس 2000ءدا نفاذ سڑکاں کوں محفوظ بنڑاونڑ اچ مددگار ثابت تھیندے تاں جو ایں قانون تے عمل درآمد دے دوران متعلقہ فریقین دے تحفظات ، سڑکاں دے انفراسٹرکچر، ذرائع نقل و حمل دی استعداد اتے ملکی معیشت خصوصاً عام آدمی تے ایندے اثرات کوں سامنڑے رکھنڑ ضروری اے ۔ وزیرِ اعظم آکھیا جو عدلیہ نال رجوع دے نال نال ملک اچ ذرائع نقل و حمل دی استعداد خصوصا ٹرکاں دی تعداد اتے ریلوے دی استعداد ودھاونڑ تے توجہ ڈتی ونجے ۔ اجلاس اچ ٹرانسپورٹرز کوں درپیش مسائل خصوصاً رشوت تے انہاں کوں اہلکاراں ولوں حراساں کرنڑ دی شکایت تے وی تفصیلی گال مہاڑ تھئی ۔ٹرانسپورٹرز کوں درپیش مسائل دا سخت نوٹس گھندے ہوئیں وزیرِ اعظم ہدایت کیتی جو ایں ضمن اچ ہک مفصل پلان تشکیل ڈتا ونجے تاں جو ٹرانسپورٹرز کوں حراساں کرنڑآلے اہلکاراں دے خلاف سخت ایکشن گھدا ونج سگے ۔
