اسلام آباد۔9دسمبر (اے پی پی) ایف آئی اے اینٹی کرپشن سرکل اسلام آباد ڈائریکٹر شہزاد بخاری اتے ڈپٹی ڈائریکٹر محمد افضل خان نیازی دی نگرانی اچ مختلف ذرائع توں ملݨ آلے شکایتاں تے اسکینڈل دی تحقیقات شروع کر ݙتی اے۔ تحقیقات اچ بدعنوانی اتے دھوکہ دہی دا ہک پیچیدہ ڄال بے نقاب تھیے جئیں اچ ایسوسی ایٹڈ پریس آف پاکستان کارپوریشن (اے پی پی سی) دے منیجر اکاؤنٹس ارشد مجید چوہدری ایں اسکینڈل دے مرکزی کردار دے طور سامھے آئن۔ سب انسپکٹر احتشام گوندل غیر قانونی بھرتیاں دے اسکینڈل اچ ملوث کئی ملزماں کوں گرفتار کیتے جئیں اچ تیمور ارشد، فواد احمد خان، سعد یوسف اتے قیصر جاوید شامل ہن جڈانجو اسکینڈل دے مرکزی ملزم منیجر اکاؤنٹس ارشد مجید چوہدری کوں وی گرفتار کر ڳھدا ڳئے۔ گرفتاریاں اوں ویلھے تھئی جڈاں خصوصی جج سینٹرل اسلام آباد قبل از گرفتاری ضمانت مسترد کرݙتی جئیں دے بعد ایف آئی اے اسکینڈل اچ ملوث لوکاں کوں پکڑݨ کیتے کاروائی کیتی۔ ایف آئی اے ذرائع موجب ملزمان مبینہ طور وݙے پیمانے تے بھرتی سکینڈل اچ ملوث ہن۔ ایں سکینڈل پاروں اے پی پی سی اتے قومی خزانے دا ٻہوں مالی ضیان تھیا اتے بھرتی دے عمل دی شفافیت تے سوال آئے۔ سکینڈل دی مکمل حد تئیں پڑتال کیتے ٻئی تحقیقات جاری اے۔ ادارہ غبن شدہ فنڈز دی وصولی کیتے کم کریندا پئے۔ ایف آئی اے اینٹی کرپشن سرکل اسلام آباد بدعنوانی دے خاتمے اتے سارے شعبیاں اچ شفافیت اتے احتساب کیتے پرعزم اے۔
