اسلام آباد – 08 – مئي (اي پي پي) اطلاعات ۽ نشريات واري وفاقي وزير مريم اورنگزيب پي ٽي آءِ چيئرمين عمران خان کي چيو آهي ته آئيني حق ٽوئيٽر، ريلي ۽ جلسن ۾ نه ٿو ملي، ثبوت کڻي ٿاڻي ۽ عدالت وڃو، ڪوڙا الزام هڻڻ، الزام بازي ڪرڻ نه ڪنهن جو قانوني حق آهي نه آئيني، شهباز شريف کان سوال پڇڻ کان اڳ عمران خان عوام کي پنهنجي سازشن جو جواب ڏي. عمران خان جي ٽوئيٽ تي ردعمل جو اظهار ڪندي پنهنجي ٽوئيٽ ۾ اطلاعات واري وزير چيو ته ٻهروپيا حق رڳو آئين ۽ قانون تحت آهي، هر شهري پنهنجي حقن جي تحفظ جو پورو قانوني حق رکي ٿو جنهن جي گهرج آهي ته ٿاڻي ۽ عدالت وڃي ۽ ثبوت فراهم ڪري، آئيني حق ٽوئيٽر، ريلي ۽ جلسن ۾ نه ٿو ملي. هن چيو ته عمران خان 35 پنڪچر، 10 ارب، سائفر، آمريڪي سازش جهڙا الزام هنيا ۽ ثبوت فراهم نه ڪيا، جيڪڏهن ثبوت آهن ته عدالت ڇو نه ٿو وڃي؟ ڪوڙا الزام هڻڻ، الزام بازي ڪرڻ نه ڪنهن جو قانوني حق آهي نه آئيني۔ هن چيو ته جڏهن عمران خان تي قاتلاڻو حملو ٿيو ان وقت خيبرپختونخواهه ۽ پنجاب ۾ ان جي پنهنجي حڪومت ۽ وڏو وزير هو، ڇا اهي سازش ۾ شامل هئا؟ عمران خان جي ڪوڙن تي هن ايف آءِ آر ڇو نه ڪاٽي؟ ڏوهارين کي ڇو نه پڪڙيو؟ اطلاعات واري وفاقي وزير چيو ته ميڊيا، جج، سياسي مخالفن جي قتل جي توهان جي سازش بي نقاب ٿيڻ تي ٻين تي پنهنجي قتل جو الزام هنيو، واهه. هن چيو ته جيڪو الزام ٻين تي هنيو، ڏوهاري پاڻ نڪتو، ٻين کي چور ڦورو چيو ۽ پاڻ ڌاڙيل ثابت ٿيو. اطلاعات واري وفاقي وزير چيو ته مخالفن، صحافين، جج، وڪيلن جي قتل جي توهان جي سازش پڪڙي وئي ته هاڻي ٻين تي پنهنجي قتل جا الزام هڻي رهيا آهيو. هن چيو ته پاناما ۾ ڪوڙ ڳالهائڻ تي شهباز شريف جي ڪيس ۾ 6 سالن کان توهان عدالت مان فرار آهيو. شهباز شريف کان سوال پڇڻ کان اڳ عوام کي پنهنجي سازشن جو جواب ڏيو. هن چيو ته عدت ۾ شادي، ٻارڙي جي والد هجڻ جو الزام هڻڻ جو انتظار باقي آهي.
