اسلام آباد – 21 – سيپٽمبر (اي پي پي) صدر ڊاڪٽر عارف علوي علم جي فروغ ۽ نوجوانن کي جديد تعليم ۽ سائنس جا علم سيکارڻ جي ضرورت تي زور ڏيندي چيو آهي ته ان جي نتيجي ۾ نه رڳو ملڪ کي ترقي يافته بڻائڻ ۾ مدد ملندي پر تعليم جي شعبي ۾ نمايان بهتري ايندي، ترقي يافته قومون پنهنجي زبان تي فخر ڪن ٿيون، پاڪستان جي آئين ۽ سپريم ڪورٽ جي فيصلي موجب پنهنجي زبان کي مستحڪم رکڻو آهي. اهڙن خيالن جو اظهار هن علامه اقبال اوپن يونيورسٽي ۾ انگريزي زبان جي حوالي سان ٽن ڏينهن واري عالمي ڪانفرنس جي افتتاحي سيشن کي خطاب ڪندي ڪيو جنهن جو اهتمام يونيورسٽي آمريڪي سفارتخاني جي سهڪار سان ڪيو هو. انگريزي زبان ۾ اڀرندڙ رجحانن بابت ڪانفرنس ۾ پاڪستان ۾ آمريڪي سفير ڊونلڊ بلوم، علامه اقبال اوپن يونيورسٽي جي وائيس چانسلر پروفيسر ڊاڪٽر ضياءَ القيوم، ملڪي ۽ غيرملڪي تعليمي ماهرن ۽ يونيورسٽي جي مختلف شعبن جي سربراهن پڻ شرڪت ڪئي. صدر چيو ته ترقي يافته قومون پنهنجي زبان تي فخر ڪن ٿيون، انگريزي زبان جي هڪ عالمي حيثيت آهي پر اردو اسان جي قومي زبان آهي، ڪجهه زبانن کي ختم ٿيڻ جو خطرو آهي جن کي ختم ٿيڻ کان بچائڻ جي لاءِ ڪوششون ڪرڻ جي ضرورت آهي. صدر زبان ۽ مواصلات جي اهميت جو ذڪر ڪندي زور ڏنو ته پنهنجي قومي زبان کانسواءِ ٻين زبانن تي پڻ عبور حاصل ڪرڻ ضروري آهي. هن چيو ته آئون فاصلاتي تعليم جو حامي رهيو آهيان، علامه اقبال اوپن يونيورسٽي ملڪ ۾ تعليم جي شعبي ۾ اڻٿڪ ڪردار ڪردار ادا ڪري رهي آهي جنهن جي شاگردن جو انگ 13 لک کان وڌيڪ آهي، نوجوانن کي انفارميشن ٽيڪنالاجي جي تعليم ۽ ٻين جديد علم سان گڏوگڏ هنرمند بڻائڻ جي ضرورت آهي. صدر ڊاڪٽر عارف علوي چيو ته قومي زباناردو کي ترقي ڏيڻ لازمي آهي، پاڪستان جي آئين ۽ سپريم ڪورٽ جي فيصلي موجب پنهنجي زبان کي مستحڪم رکڻو آهي، اها اسان جي ميراث آهي ان کي نه ٿو ڇڏي سگهجي. هن چيو ته زبان اسان جي زندگين ۾ اهم ڪردار ادا ڪري ٿي، زبان کانسواءِ علم حاصل ڪرڻ ممڪن نه آهي، سر سيد احمد خان ننڍي کنڊ جي مسلمانن کي انگريزي زبان سکڻ جي لاءِ راغب ڪيو جنهن جو مقصد اهو هو ته هو جديد علم سکي سگهن. صدر چيو ته فيڪ نيوز جي ڪري سڄي دنيا جي معاشرن ۾ ڇڪتاڻ وڌي رهي آهي جنهن کي روڪڻ جي ضرورت آهي. هن چيو ته انگريزي زبان ۾ 15 هزار جي لڳ ڀڳ لفظ آهن جڏهن ته علم ۾ ان جو انگ وسيع آهي، علم تي ٻڌل مختلف ايپس تعليم جي فروغ لاءِ انتهائي اهم ڪردار ادا ڪري سگهن ٿا. ڊاڪٽر عارف علوي علامه اقبال اوپن يونيورسٽي ۾ آمريڪي سفارتخاني جي سهڪار سان انگريزي زبان جي حوالي سان ٿيندڙ ڪانفرنس تي سفارتخاني جا ٿورا مڃيا. هن چيو ته پاڪستان کي تيزي سان ترقي جون منزلون طئي ڪرڻيون آهن جڏهن ته ان جي لاءِ ضروري آهي ته اسان دنيا جي ٻين قومن سان بهتر طريقي سان ڪميونيڪيٽ ڪريون. پاڪستان ۾ آمريڪا جي سفير ڊونلڊ بلوم تقريب کي خطاب ڪندي چيو ته پاڪستان ۾ خوفناڪ ٻوڏ سان وڏي انگ ۾ ماڻهو فوت ٿي ويا آهن ۽ لکن جي انگ ۾ ماڻهو بي گهر ۽ ملڪيتن کي نقصان پهتو آهي. هن چيو ته هن مشڪل جي گهڙيءَ ۾ آمريڪا پاڪستان سان گڏ بيٺل آهي. آمريڪي سفير چيو ته پڙهائي جي لاءِ عزم ۽ لڳاءُ ضروري آهي، آمريڪا پاڪستان ۾ فل برائٽ پروگرام تحت شاگردن ۽ استادن جي صلاحيت وڌائڻ جي لاءِ ڪيترن ئي سالن ڪوششون ڪري رهيو آهي، ان پروگرام تحت هن سال 800 شاگردن ۽ استادن کي آمريڪا موڪليو ويو جڏهن ته هيستائين ان پروگرام سان تعليمي شعبي سان واڳيل 14 هزار کان وڌيڪ ماڻهو فائدو کڻي چڪا آهن.
