اسلام آباد – 13 – سيپٽمبر (اي پي پي) ايشيا پيسفڪ ريجن ملڪن جي نمائندن چيو آهي ته قدرتي آفت ڪٿي به اچي سگهي ٿي، جاگرافيائي سرحدن کان هٽي ڪري هڪ ٻئي جو سهارو بڻجڻ گهرجي، غذائي تحفظ ۽ غذائيت جي کوٽ جهڙن مسئلن جي حل لاءِ قومي سطح تي ايمرجنسي لڳائڻ جي ضرورت آهي. اهڙن خيالن جو اظهار آءِ پي يو ايشيا پيسفڪ ريجن ملڪن جي شرڪت ڪندڙن سيمينار کي خطاب ڪندي ڪيو. اجلاس جي صدارت ڪندڙ مهناز اڪبر عزيز چيو ته هن سيشن جو عنوان ”غربت ۽ بک ۽ موسمياتي تبديليون“ آهي. هن چيو ته پاڪستان کي هن وقت موسمياتي تبديلين جي ڪري ٻوڏ جي تباهين کي منهن ڏيڻو پيو آهي، جاني ۽ مالي نقصان جا تفصيل ٻڌائيندي هن چيو ته انساني جانين جي زيان سميت اسڪول، رستا، فصلون، پليون، ريلوي ٽريڪ تباهه ٿيا، گلوبل وارمنگ ڪنهن هڪ ملڪ جو مسئلو نه آهي پر اهو هڪ عالمي مسئلو آهي، ان مسئلي تي اسان کي هڪ ٻئي سان گڏجي هلڻو پوندو. ايشيائي ملڪن کي گڏجي ويهي ان جو ڪو ٺوس حل ڪڍڻو پوندو. پاڪستان ان صورتحال جو ذميوار نه آهي. اسان سڀني کي گڏجي غذائي تحفظ جي حوالي سان نجي ۽ سرڪاري سطح تي قابل عمل ۽ ٺوس پاليسي جي جوڙجڪ جي لاءِ پنهنجو ڪردار ادا ڪرڻ گهرجي. پاليسي ساز ادارا رڳو انگن اکرن تي دارومدار نه ٿا ڪن پر عوامي نمائندا هجڻ جي حيثيت سان ڪيترين ئي زميني حقيقتن کان به اهي آگاهه هوندا آهن. وفاقي وزير شازيه مري ايشيا پيسفڪ ريجن ۾ غربت ۽ بک جي حوالي سان پنهنجي ورچوئل خطاب ۾ چيو ته هزاريه ترقياتي هدفن تحت 2030ع تائين غذائي کوٽ جو خاتمو اسان جو اهم هدف آهي، ورلڊ فوڊ پروگرام جي انگن اکرن موجب هن وقت دنيا ۾ 798 ملين ماڻهو غذائي کوٽ ۽ بک جو شڪار آهن. معاشي عدم استحڪام ۽ موسمياتي تبديلين جي ڪري ان انگ ۾ روزانو اضافو ٿي رهيو آهي. هن چيو ته ٻارن ۾ غذائي کوٽ جي ڪري انهن جي واڌويجهه متاثر ٿئي ٿي جنهن جي ڪري اسان جو مستقبل متاثر ٿيندو. انساني وسيلن تي خرچ ڪري اسان هڪ بهتر ۽ معياري معاشرو جوڙي سگهون ٿا. هن چيو ته بينظير انڪم سپورٽ پروگرام تحت بينظير واڌويجهه پروگرام شروع ڪيو ويو آهي. هن چيو ته ڏکڻ ايشيائي ملڪن جا ماڻهو وڏي پئماني تي بک جي صورتحال کي منهن ڏئي رهيا آهن. هن چيو ته پاڪستان جو گلوبل وارمنگ پيدا ڪندڙ گيسز ۾ حصو هڪ سيڪڙو کان به گهٽ آهي پر تازي ٻوڏ جي ڪري وڏي پئماني تي قيمتي انساني جانين جي زيان سميت بيٺل فصل تباهه ٿي ويا، 8 لک کان وڌيڪ چوپايو مال مري ويو، مجموعي طور تي 33 لک ماڻهو متاثر ٿيا. هن چيو ته عالمي برادري کي گهرجي ته ان صورتحال جو ادراڪ ڪري ۽ پاڪستان جي مدد ڪري. سن پروگرام جي سربراهه سلويا ڪائو فام چيو ته نيوٽريشن پروگرام جي جي حوالي سان ايس ڊي جيز تي عملدرآمد يقيني بڻائڻ سان انساني وسيلا بهتر ٿي سگهن ٿا ۽ اهي ئي انساني وسيلا ڪنهن به ملڪ جي اقتصادي ۽ معاشي ترقي ۾ اهم ڪردار ادا ڪري سگهن ٿا. هن چيو ته غربت جي ڪري دنيا جي 30 سيڪڙو آبادي غذائي کوٽ جو شڪار آهي، ان صورتحال تي ڌيان ڏيڻ جي ضرورت آهي. هن محفوظ ۽ صحتمند غذا تائين برابر پهچ کي يقيني بڻائڻ جي ضرورت تي زور ڏنو ۽ چيو ته ان ڏس ۾ غذائي فصلن جي پيداوار وڌائڻي پوندي ۽ متاثر ملڪن جي حڪومتن کي گهرجي ته اهي پنهنجي ماڻهن کي کاڌي پيتي جي شين تي سبسڊي ڏين. ٿائيلينڊ جي پارليامينٽ ميمبر ڪروسيڊ نان چيو ته ماڻهن کي غربت مان ڪڍڻ جي لاءِ اسان کي موثر حڪمت عملي ٺاهڻي پوندي. روس ۽ يوڪرين تڪرار سان به عالمي سطح تي غربت ۽ بک ۾ اضافو ٿيو آهي. هن چيو ته پاڪستان ۾ هن وقت ماڻهو بيروزگاري جي ڪري غربت جو شڪار آهن. نيپال جي شرادا ديوي چيو ته ماءُ ۽ ٻار جي غذائي تحفظ سان اسان پنهنجو مستقبل بهتر بڻائي سگهون ٿا. يونيسيف جي ڊاڪٽر صبا چيو ته معياري غذا جي فراهمي نه رڳو ٻارن جو پر اسان سڀني جي صحت جو مسئلو آهي. پاڪستان ۾ 48 سيڪڙو ٻار غذائي کوٽ جو شڪار آهن، ان ڏس ۾ اسان کي غذائي ايمرجنسي لڳائڻي پوندي. نيوٽريشن ۽ غذائي تحفظ جي حوالي سان ايس ڊي جيز هدف حاصل ڪرڻ جي لاءِ ڪم جي رفتار تيز ڪرڻي پوندي.
